星期一返工，又會見到班同事。返咗咁多年工，同事之中真係咩人都有，有啲可以超越同事關係，同你變到老友鬼鬼；有啲工作經驗較耐，當正自己係揸Fit人的老屎忽；有啲完全受唔住打擊，話兩話就喊嘅新人……睇下你身邊有邊啲同事可以對號入座？

1.放假都約出去玩

其實同呢種同事的關係，已經唔係工作伙伴咁簡單，直頭係朋友。間唔中又會相約一齊出去玩，又會講吓老闆同事嘅壞話，最安心係唔怕畀對方出賣，唔係朋友係咩丫你話？

2.老屎忽
呢種人已經喺公司做咗好耐，基本上將公司當成自己的養老院，返工偷吓懶都冇咩所謂。不過雖然佢哋平時睇落好似懶懶散散，但有咩危機時刻問佢哋，佢哋通常都可以好快諗出解決方法。

3.玻璃心人
呢種同事通常年紀較輕，危機處理能力係0，但係自尊心就極高，話佢兩句就會崩潰，之後就會默默辭職……

4.固執鬼
呢種人有自己嘅的處事方式，其他人好難改變佢過分自我的想法。不過好彩，多數呢種人嘅能力都好強，唔會有咩手尾要你執。

5.小綿羊
同玻璃心人唔同，小綿羊深知自身能力可能不足，識得低下頭請人幫助，就算畀人鬧都默默承受，虛心學習，如果冇出過咩大問題，小綿羊其實都幾得人鍾意。

6.開心果
通常都係傻大姐嘅角色，唔單只間唔中同大家一齊出去玩，有時返工見同事士氣不振，開心果都會適時搞好氣氛。

7.世界仔
天生嘅交際高手，但自己嘅事就收收埋埋。任何時候都唔好同世界仔作對，因為佢哋將來多數都會成為老闆心腹。

8.姣婆
返工唔知做乜，發展辦公室戀情才是正經事吧。