相信唔少人都試過用電話打機，普通遊戲例如《Candy Crush》、《Pokemon GO》，一般電話都搞得掂，但如果玩《PUBG Mobile》呢啲高畫質遊戲，唔只部電話會燒電，仲會熱到可以煎熟蛋。今次Asus嘅首部電競手機ROG Phone專為打機而設，一齊睇睇有咩咁巴閉！

電話拎得嚟打機，規格當然唔會係中低階配置。ROG Phone採用咗全球最快2.96GHz嘅8核心高通Snapdragon 845處理器，以及高通嘅Adreno 630 GPU。同時，呢部機為咗減低打機時電話過熱嘅問題，佢內建咗高效率3D液態均溫散熱系統，可以提升處理器效能及運算續持時間。

經過我玩完一輪後，電話溫度只係微熱，同時ROG Phone機配備3組獨特嘅AirTriggers超音波觸控鍵，其中位於機身右側嘅2組觸控鍵，可以喺打機時當做L1及R1掣，你可以自己設定「瞄準」、「射擊」等動作，方便大家打機可以有更快反應。

Asus同時為ROG Phone推出咗唔同配件，包括一個「TwinView 雙螢幕基座」，佢可以為電話提供第二個螢幕，仲搭配咗散熱風扇及實體按鈕，用家可以邊玩邊進行直播，或者用第二螢幕顯示地圖。

另外，配件仲有可以用滑鼠及鍵盤操作嘅「桌上型遊戲基座」，可以將電話當Desktop咁用。

呢個「GameVice遊戲控制器」可以將手掣融入電話中，打機起上嚟就更順手。

不過呢部ROG Phone掛住「電競手機」嘅牌頭，當然售價都唔會平，8GB RAM/128GB容量版售價為港幣7398，8GB RAM/512GB容量版售價為港幣9198，而呢部機今日正式推出。

ROG Phone基本規格：

．顏色：幻影黑

．螢幕：6吋18.9 AMOLED（2160x1080）螢幕，具備90Hz畫面更新率，1毫米反應時間550nits亮度

．CPU：2.96GHz 64位元高通®八核心處理器Snapdragon™845（10奈米製程）

．GPU：高通®Adreno™630

．記憶體：8GB RAM

．儲存空間：128GB / 512GB内建儲存空間

．後鏡頭（主）：Sony旗艦級IMX363 1200萬像素感光元件（112.55吋大型感光元件，1.4微米像素大小），F1.7光圈

．電池：4000mAh

．作業系統：Android Oreo